. එංගලන්තය අමාරුවේ දාන්න පුළුවන් - දිමුත් | කෙළිමඬල
2019 අපේ‍්‍රල් මස 23 වැනි අගහරුවාදා
එංගලන්තය අමාරුවේ දාන්න පුළුවන් - දිමුත්
2018-11-15 19:48:03 | දමින්ද විජේසූරිය පල්ලෙකැළේ ක්‍රීඩාංගණයේ සිට

එංගලන්ත කණ්ඩායමේ දෙවැනි ඉනිම ලකුණු 250 කට අඩුවෙන් සීමාකරගත හැකිවුවහොත් දෙවැනි ටෙස්ට් තරගය ජයගැනීමේ හොඳ අවස්ථාවක් ඇතැයි ශ්‍රී ලංකා ආරම්භක පිතිකරු දිමුත් කරුණාරත්න කියයි. ශ්‍රී ලංකාව සහ එංගලන්තය අතර පල්ලෙකැළේ ක්‍රීඩාංගණයේදී පැවැත්වෙන දෙවැනි ටෙස්ට් තරගයේ දෙවැනි දිනය වන අද (15 වැනිදා) සවස ක්‍රීඩාව නතර කිරීමෙන් පසුව පැවැති පුවත් පත් සාකච්ඡාවේදී දිමුත් කරුණාරත්න මේ බව පැවසීය. 


“මේ ලබාගත් ලකුණු 46 වාසිය ඉතාම විශාලයි. අපට හෙට උදේම කඩුලු දෙක තුනක් දවාගන්න පුළුවන් වුණොත් ඒ ගොල්ලන්ව අමාරුවේ දාන්න අපට පුළුවන් වේවි....එංගලන්ත පිල දෙවැනි ඉනිමේදී ලකුණු 250 ක් ලබාගන්න කලින් දවාගන්න අපට පුළුවන් වුණොත් ඒක යා හැකි ඉලක්කයක් වේවි” යයි ශ්‍රී ලංකා ආරම්භක පිතිකරුවා පැවසීය. 


මේ වෙනුවෙන් ශ්‍රී ලංකා පිල සතුව ඇත්තේ කදිම උපායකි. එනම් එංගලන්ත පිතිකරුවන් විශාල පහර කරා යාමේ අවස්ථාව අවහිර කිරීමයි. 


“ඔවුන්ට තනි ලකුණු වලින් තමන්ගේ ලකුණු ලබාගන්න සලස්වන්න ඕනේ. පළමු ඉනිමේදී ඔවුන් දඟ පන්දු යවන්නන් හමුවේ ලොකු පහරවල් ගැහැව්වා. ඔවුන්ගේ උපක්‍රමය වුණේ ඒකයි. ඒත් ලොකු පහරවල් ගහන්න ඔවුන්ට ඉවසන්න වෙනවා. අවදානමක් ගන්න වෙනවා. අපේ සැලැස්ම ඒකයි” යයිද දිමුත් පැවසීය. 


එංගලන්ත පිතිකරුවෝ සිය පළමු ඉනිමට හතරේ පහර 24 ක් සහ හයේ පහර 7 ක් ඇතුළත් කළහ. ඒ අනුව එංගලන්තය මුල් ඉනිමේදී ලබාගත් ලකුණු 285 න් (දඬුවම් ලකුණු 5 හැරුණු විට) ලකුණු 138 ක් ලබාගෙන ඇත්තේ හතරේ සහ හයේ පහර වලිනි. 


තණතීරුව මේ වන විටත් විශාල ලෙසින් දඟ පන්දු යවන්නන්ට උපකාරී වෙමින් තිබේ. නිරන්තරයෙන් පන්දු නොයවන ජෝ රූට් පවා පන්දුවෙන් සාර්ථක දඟ කැවීමක් ලබාගත් අතර අකිල ධනංජය, ඩිල්රුවන් පෙරේරා සහ මාලින්ද පුෂ්පකුමාරට එයින් හොඳ ප්‍රයෝජන ලබාගත හැකිවනු ඇත. 


මෙවන් තණතීරුවකදී සැබෑ දඟ පන්දු යවන්නන් හමුවේ විශාල පහර කරා යාම පහසු අභියෝගයක් නොවේ. ඒ වෙනුවෙන් කිසියම් අවදානමක් ගත යුතුව තිබේ. 


ශ්‍රී ලංකා කණ්ඩායමේ වාසිය ලකුණු 46 ක් නොව ඊට වඩා වැඩිකරගැනීමේ සාධාරණ අවස්ථාවක් තිබුණ නමුත් දිමුත් කරුණාරත්න දුවද්දී දවාගත් බෙන් ස්ටෝක්ස් එය අවහිර කර දැමීය. තරගයේ එවකට පැවැති තත්ත්වය අනුව, එය මහත් අවාසනාවන්ත දැවී යාමක් විය. 


“ධනංජයත් ඉතාම හොඳින් ලකුණු ලබාගනිමින් හිටියේ. එයාගේ අර්ධ ශතකය ලබාගන්න උදව් කරන්න මට හිතුණා. ඒ නිසයි ඒ ලකුණට දිව්වේ...ඒත් ක්‍රිකට් ක්‍රීඩාවේදී මේ වගේ දේවල් වෙනවා”


ලකුණක් ලබාගැනීමට ධනංජය සහ කරුණාරත්න දෙදෙනා තෝරාගත්තේ වැරදි ක්‍රීඩකයායි. වේග පන්දු යවන්නකු වන බෙන් ස්ටෝක්ස් එංගලන්ත ක්‍රීඩකයන් අතරේ ඉතාමත් වේගයෙන් පන්දුව දමාගසන ක්‍රීඩකයෙකි. ස්ටෝක්ස්ගේ දකුණත දිමුත්ගේ දෙපා වලට වඩා වේගවත්ය. 


එක්ස්ට්‍රා කවර්ස් හි සිට පන්දුව අහුලාගත් ස්ටෝක්ස්ගේ අතිනි ගිළිහුණු පන්දුව අකුණු සැරයක වේගයෙන් කඩුල්ලට කඩා වැදුණේය. දිමුත්ගේ දැවීයාමෙන් පසුව ලකුණු 38 ක් ඇතුළතදී ශ්‍රී ලංකා පිලේ කඩුලු 4 ක් ඇද වැටිණ. 


කෙසේ වෙතත් විශිෂ්ට පිතිහරඹයක නිරත වූ රොෂේන් සිල්වා පසුපෙළ පිතිකරුවන් සමග එක්ව ශ්‍රී ලංකා කණ්ඩායම එංගලන්තයට වඩා ඉදිරියට ගෙන ගියේය. 


“රොෂේන් දඟ පන්දු යවන්නන් හමුවේ ඉතාමත් හොඳින් පන්දුවට පහර දෙන පිතිකරුවෙක්. අපි ඒක දිල්ලි ටෙස්ට් තරගයේදීත් දැක්කා. එදා එයා රවීන්ද්‍ර ජදේජා වගේම රවිචන්ද්‍රන් අශ්වින් හමුවේත් ඉතාම හොඳින් පන්දුවට පහර දුන්නා. 


“ඔහු ලකුණු ලබාගැනීමේ අවස්ථාව අනෙක් පිතිකරුවාත් සමග මාරු කරගන්නා විට පන්දු යවන්නන්ට කිසියම් ඉලක්කයක් ඇතිව පන්දු යැවීම අමාරුයි. අකිලයි රොෂේනුයි පන්දුවට පහර දෙද්දි වුණේ ඒකම තමයි” යයි රොෂේන් සිල්වා සමග වසර හතරක් එකම පාසල් කණ්ඩායමේ ක්‍රීඩා කළ දිමුත් කරුණාරත්න පැවසීය. 

ඔබේ ප්‍රතිචාර

නම :
විද්‍යුත් තැපැල් ලිපිනය :
ඔබේ ප‍්‍රතිචාර :
මුම්බායි පිල හයවැනි ජයත් ලබයි...
2019-04-18 20:15:50
ඉන්දීය ප්‍රිමියර් ලීග් තරගාවලියේ 34 වැනි තරගය ලෙස මුම්බායි ඉන්දියන්ස් කණ්ඩායම සහ දිල්ලි කැපිටල්ස් කණ්ඩායම අතර දිල්ලිහිදී අද (18 වැනිදා...
මාලිංග ක්‍රිකට් පිටියෙන් සමුගනී ...
2019-04-17 20:23:33
ශ්‍රී ලංකා එක්දින පිලේ හිටපු නායක සුපිරි වේග පන්දු යවන ක්‍රීඩක ලසිත් මාලිංග අන්තර්ජාතික ක්‍රිකට් පිටියෙන් සමුගැනීමට තීරණය කර ඇ...
ආරම්භක පිතිකරුවන් තෝරාගැනීමේ හිසරදය...
2019-04-17 13:35:49
ශ්‍රී ලංකාව ක්‍රිකට් ලෝක ශූරයන් බවට පත්වූ 1996 වසරේදී මෙන්ම අනු ශූරයන් බවට පත්වූ 2007 සහ 2011 වසරවලදීත් ශ්‍රී ලංකා කණ්ඩායමට ආර...
අසන්ත ද මැල්...
2019-04-18 18:39:23
“මම මාලිංගට දුරකථනයෙන් කථා කළා. මම ඔහුට කිව්වා අපිට ඔහුගේ නායකත්වය පිළිබඳව ප්‍රශ්නයක් නෑ. ඒත් මේ වෙලාවේ අපිට ඕනේ කණ්ඩායම එකමුතුව යන්න කිය...
ලෝක කුසලාන තරගාවලියෙන් ප්‍රබලයෝ විසිවෙති...
ශ්‍රී ලංකා කන්ඩායමට සුබපතන්නද... පෘතුගීසි කන්ඩායමට සුබපතන්නද කියලා හිතාගන්න බෑ ...
මාලිංග ක්‍රිකට් පිටියෙන් සමුගනී ...
තේරීම් කමිටු සභාපති පවසන ආකයට මාලිංගගේ නායකත්වය කිසිම ගැටළුවක් නැතත් අනෙත් ක්‍රීඩකයන් සහයෝගය නොදෙක්වීමයි. රටක් නියෝජනය කරන අනෙත් ක්‍රීඩකයන් නායකයට සහය...
මාලිංග ක්‍රිකට් පිටියෙන් සමුගනී ...
රටට සෙල්ලම් කරන්න බැරි අය වැඩක් නෑ.....තමන්ගේ පෞද්ගලික හිතු මතේට මෙහෙම රටක්....  සෙල්ලම් කරන්න තරගෙකට බැහැ කියන එක මහ අමන වැඩක්..... රටේ සල්ලි...
මාලිංග ක්‍රිකට් පිටියෙන් සමුගනී ...
මාලිංග කරුණාකර මහජනතාවට පෙන්නන්න ඔබ තනතුරු සඳහා ගිජු පුද්ගලයෙක් නොවන බව....ලෝක කුසලාන තරගාවලිය සඳහා ඉදිරිපත් වී දක්ෂතා පෙන්වන්න. මහජනතාව ...
මාලිංග ක්‍රිකට් පිටියෙන් සමුගනී ...
ආගම පදනම් කරගෙන ක්‍රීඩකයන් තේරීම ශ්‍රී ලංකාවේ ක්‍රිකට් ක්‍රීඩාවේ අනාගතයට ඉතාමත් අහිතකර වේ. ...