. දකුණු අප්‍රිකානු ඉනිම 262 කට සීමා වෙයි | කෙළිමඬල
2019 ජනවාරි මස 19 වැනි සෙනසුරාදා
දකුණු අප්‍රිකානු ඉනිම 262 කට සීමා වෙයි
2019-01-11 21:36:38 | .

පකිස්තානය සහ දකුණු අප්‍රිකාව අතර ජොහැන්නස්බර්ග්හිදී පැවැත්වෙන තෙවැනි ටෙස්ට් ක්‍රිකට් තරගයේ කාසියේ වාසිය දිනා පළමුවෙන් පන්දුවට පහරදුන් දකුණු අප්‍රිකාව සිය පළමු ඉනිම වෙනුවෙන් සියලු දෙනා දැවී ලකුණු 262 ක් ලබාගත්තේය.

පළමු දිනය වූ අද (11 වැනිදා) තරගය නතර කරන විට පළමු ඉනිම වෙනුවෙන් පන්දුවට පහරදෙමින් සිටි පාකිස්තාන කණ්ඩායම කඩුලු 2 ක් දැවී ලකුණු 17 ක් ලබා සිටියේය. ඒ වන විට ආරම්භක පිතිකරු ඉමාම් උල් හක් නොදැවී ලකුණු 10 ක් ලබා සිටි අතර රාත්‍රී මුරකරු පිතිකරු ලෙස පිටියට පිවිසි මොහොමඞ් අබ්බාස් ලකුණු ලබා සිටියේ නැත.

පිට පිටම යැවූ පන්දු දෙකකදී ශාන් මසූද් (2) සහ අසාර් අලී (0) පිටියෙන් ඉවත් කිරීමට සමත් වූ වර්නන් පිලැන්ඩර්, ඉනිම ආරම්භයේදී පාකිස්තාන කණ්ඩායම මහත් අසීරු තත්වයකට ඇද දැමුවේය.

නිත්‍ය නායක ෆෆ් ඩුප්ලෙසි තරග තහනමකට ලක්ව සිටීම නිසා මෙම තරගයේදී දකුණු අප්‍රිකානු කණ්ඩායමේ තාවකාලික නායකයා ලෙස කටයුතු කරන ඩීන් එල්ගා ලකුණු 5 ක් ලබා සිටියදී පිටියෙන් ඉවත් කිරීමට මොහොමඞ් අබ්බාස් සමත් වූයේ කඩුලු රකින ක්‍රීඩක සර්ෆරාස් අහමඞ්ගේ සහායද ඇතිවය.

ඉන් අනතුරුව පිටියට පිවිසි හෂීම් අම්ලා (41) සමග එක්ව දෙවැනි කඩුල්ල වෙනුවෙන් ලකුණු 126 ක සම්බන්ධතාවක් ගොඩනැගීමට සෙසු ආරම්භක පිතිකරුවා වූ ඒඞ්න් මාක්‍රම් (90) සමත් විය. දක්ෂ පිතිහරඹයක නිරත වූ මාක්‍රම් සිය අර්ධ ශතකය හතරේ පහර 16 කින් සැරසූ අතර ශතය පෙනි පෙනී සිටියදී ෆාහිම් අෂ්රෆ්ගේ පන්දුක් හමුවේ සර්ෆරාස් අහමඞ් අතට උඩ පන්දුවක් දෙමින් දැවී ගියේය.

මුලු ලකුණු සංඛ්‍යාව 154 ක් වන විට ශදාබ් ඛාන්ගේ පන්දුවක් හමුවේ අසාද් ශෆීක් අතට උඩ පන්දුවක් දෙමින් හෂීම් අම්ලාද පිටියෙන් ඉවත්ව ගියේය. කෙසේ වුවත් සිවුවැනි කඩුල්ල වෙනුවෙන් ලකුණු 75 ක සම්බන්ධතාවක් ගොඩනැගූ තියුනිස් ඩි’බ්‍රයන් (49) සහ සුබායර් හම්සා (41) දකුණු අප්‍රිකානු කණ්ඩායම යම් ස්ථාවර තත්වයකට රැගෙන ගියහ.

අර්ධ ශතකයට ලකුණක් පසුපසින් සිටියදී මොහොමඞ් අබ්බාස්ගේ පන්දුවක් හමුවේ කඩුල්ල මුවා කිරීමේ වරදට හසුවෙමින් බ්‍රයන් පිටියෙන් ඉවත්ව ගිය අතර ඉන් අනතුරුව ලකුණු 33 ක් තුළ දකුණු අප්‍රිකානු කණ්ඩායමේ අවසන් කඩුලු 6 ම දවාගැනීමට පාකිස්තාන පන්දු යවන්නෝ සමත් වූහ.

එහිදී දක්ෂ පන්දු යැවීමක නිරත වූ ෆාහීම් අෂ්රෆ් ලකුණු 57 කට කඩුලු 3 ක් දවාගත් අතර මොහොමඞ් අමීර්, මොහොමඞ් අබ්බාස් සහ හසන් අලී කඩුලු 2 බැගින් දවාගනිමින් දකුණු අප්‍රිකානු පිතිකරුවන් අසරණ කිරීම සඳහා අෂ්රෆ්ට අනගි සහායක් දුන්හ.


දකුණු අප්‍රිකානු පළමු ඉනිම - සියලු දෙනා දැවී 262
(ඒඞ්න් මාක්‍රම් 90, හෂීම් අම්ලා 41, තියුනිස් ඩි’බ්‍රයන් 49, සුබායර් හම්සා 41, ක්වින්ටින් ඩි’කොක් 18, ෆාහීම් අෂ්රෆ් 57/3, මොහොමඞ් අමීර් 36/2, මොහොමඞ් අබ්බාස් 44/2 හසන් අලී 75/2)

පාකිස්තාන පළමු ඉනිම - කඩුලු 2 ක් දැවී 17
(වර්නන් පිලැන්දර් 01/2)


-036

 

ඔබේ ප්‍රතිචාර

නම :
විද්‍යුත් තැපැල් ලිපිනය :
ඔබේ ප‍්‍රතිචාර :
ශ්‍රී ලංකා ‘ඒ’ පිලට 1-0 ක තරගාවලි ජයක්...
2019-01-16 12:42:19
සංචාරක අයර්ලන්ත ‘ඒ’ කණ්ඩායම සහ ශ්‍රී ලංකා ‘ඒ’ කණ්ඩායම අතර සූරියවැව මහින්ද රාජපක්‍ෂ ජාත්‍යන්තර ක්‍ර...
තිසරගෙන් පන්දු 26 කදී ලකුණු 74 ක්...
2019-01-13 21:45:55
බංග්ලාදේශ ප්‍රීමියර් ලීග් (බී.පී.එල්.) විස්සයි20 ක්‍රිකට් තරගාවලියේ කොමිලා වික්ටෝරියන්ස් පිල සහ චිතගොන් වයිකිංස් පිල අතර ඩකාහි මීර්පූර් ක්&...
ශ්‍රී ලංකා යොවුන් පිලට කඩුලු 3 ක ජයක් ...
2019-01-12 12:55:36
අභියෝගත්මක ඉලක්කයක් කරා සාර්ථකව ගිය ශ්‍රී ලංකා 19 න් පහළ කණ්ඩායම කොළඹ එස්.එස්.සී. ක්‍රීඩාංගණයේදී පැවැති යොවුන් ටෙස්ට් තරගයේදී කඩුල...
පැතුම් - කමිඳු බලාපොරොත්තු රඳවාගනිති...
2019-01-15 16:13:56
සංචාරක අයර්ලන්ත ‘ඒ’ කණ්ඩායමට එරෙහිව සූරියවැව මහින්ද රාජපක්ෂ ක්‍රීඩාංගණයේදී පැවැත්වෙන නිල නොවන ටෙස්ට් ක්‍රිකට් තරගය තෙව...