. එක්දින නායකත්වයත් දිමුත්ගේ හිස මතට | කෙළිමඬල
2019 මාර්තු මස 24 වැනි ඉරිදා
එක්දින නායකත්වයත් දිමුත්ගේ හිස මතට
2019-03-11 17:43:37 | යොහාන් භාසුර

එංගලන්තයේදී ලබන මැයි මස ආරම්භ වන ලෝක කුසලාන ක්‍රිකට් තරගාවලියට සහභාගි වන ශ්‍රී ලංකා එක්දින කණ්ඩායමේ නායකත්වය සඳහා දිමුත් කරුණාරත්න පත්කිරීම පිළිබඳව අවධානය යොමුකර ඇති බව ජාතික ක්‍රිකට් තේරීම් කමිටුව පවසයි.

“දිමුත් ටෙස්ට් කණ්ඩායමේදී සිය හැකියාව ප්‍රදර්ශනය කර තිබෙනවා. ඒ නිසා එක්දින කණ්ඩායමේ නායකත්වයටත් ඔහු පිළිබඳව අපි අවධානය යොමු කරලා තියෙනවා. නමුත් ඒක හිටිහැටියේ කරන්න බෑ. ඒකට කාලය අවශ්‍යයි”

“ලසිත් මාලිංගට ඉතිරි එක්දින තරග දෙක සහ විස්සයි20 තරග තුනත් ලබා දෙනවා. සාර්ථකත්වයක් නැති නම් අපිට ක්‍රීඩකයා කවුද කියන එක ප්‍රශ්නයක් නොවෙයි. විකල්පයකට යන්න වෙනවා” යයි යයි තේරීම් කමිටු නිලධාරියෙක් ලංකාදීපට පැවසීය.

“ලෝක කුසලාන තරගාවලියට පෙර අන්තර් පළාත් තරගාවලියක් පැවැත්වෙනවා. එහි  කණ්ඩායම් තුනක දිමුත්, මාලිංග සහ මැතිව්ස් නායකයන් ලෙස කටයුතු කරනවා. එහිදී අපිට කවුද වඩාත් සුදුසු කියලා බලන්න අවස්ථාව තියෙනවා”

“අපි පත්වුණ ගමන් දිමුත්ව ටෙස්ට් පිලේ උපනායකයා කළා. ඉන් පසුව චන්දිමාල් ඉවත් කරලා දිමුත් නායකත්වයට පත්කළා. මාලිංග එක්දින පිලේ නායකත්වයට පත්කළා” යැයි ද තේරීම් කමිටු නිලධාරියා වැඩි දුරටත් පැවසීය.

ලසිත් මාලිංග නායකත්වයට පත්වීමෙන් පසුව ශ්‍රී ලංකා එක්දින පිල මේ වන විට නවසීලන්තයේදී සහ දකුණු අප්‍රිකාවේදී පිට පිටම එක්දින තරග හයක් පරාජයට පත්ව තිබේ.

එක්සත් අරාබි එමිර් රාජ්‍යයේදී පසුගිය වසරේ සැප්තැම්බර් මස පැවැති ආසියානු කුසලාන ක්‍රිකට් තරගාවලියේ සිට ශ්‍රී ලංකා එක්දින පිල තරග 13 කට සහභාගි වී ඇතත් ජයගෙන ඇත්තේ එංගලන්තයට එරෙහිව ශ්‍රී ලංකාවේදී පැවැති තරගයක් පමණි. තවත් තරගයක් විසඳුමකින් තොරව අවසන් වී තිබේ. සෙසු තරග 11 පරාජයට පත්වී තිබේ.

මේ අතර ඉතාම විශ්වාස කටයුතු ආරංචි මාර්ග වලින් දැනගන්නට ඇත්තේ එක්දින පිලේ නායකත්වය බාරගැනීමට කැමතිද යන්න ඇන්ජලෝ මැතිව්ස්ගෙන් විමසීමක් කර ඇතත් ඔහු ඊට අකමැති වී තිබෙන බවයි. වත්මන් පුහුණුකරු චන්දික හතුරුසිංහ මහතා සමග තමන්ට තවදුරටත් වැඩකිරීමට බැරි බව පවසා ඇති හිටපු නායක මැතිව්ස් තමන්ට ලැබුණු අවස්ථාව ප්‍රතික්ෂේප කර තිබේ.

අසන්ත ද මෙල් මහතාගේ සභාපතිත්වයෙන් යුත් ජාතික ක්‍රිකට් තේරීම් කමිටුව සහ ශ්‍රී ලංකා ක්‍රිකට් විධායක කමිටුව අතර අද (11) පෙරවරුවේ ශ්‍රී ලංකා ක්‍රිකට් ආයතනයේදී ශ්‍රී ලංකා ක්‍රිකට් කණ්ඩායම සම්බන්ධයෙන් විශේෂ සාකච්ඡාවක් පැවැත්විණි. එහිදී ශ්‍රී ලංකා ක්‍රිකට් පිලේ දැන් පැවැත්වෙන දකුණු අප්‍රිකානු සංචාරයේ දස්කම් පිළිබඳව වැඩි අවධානයක් යොමු කළ බව තේරීම් කමිටුව පවසයි.

ශ්‍රී ලංකා කණ්ඩායමට නවක ක්‍රීඩකයන් ඇතුළත් කිරීම, ලෝක කුසලාන තරගාවලියට කණ්ඩායම සූදානම් කිරීම සහ අන්තර් පළාත් තරගාවලිය සංවිධානය කරන ආකාරය පිළිබඳව එහිදී සාකච්ඡා කර තිබේ.

අන්තර් පළාත් එක්දින තරගාවලිය ලබන අප්‍රේල් මස 4 වැනිදා සිට 12 වැනිදා දක්වා පැවැත්වෙන බවත් එයට කණ්ඩායම් හතරක් සහභාගි වන බවත් ශ්‍රී ලංකා ක්‍රිකට් ආයතනයේ සභාපති ශම්මි සිල්වා මහතා පැවසීය.

“ලෝක කුසලාන තරගාවලිය ඉලක්ක කරගනෙයි අපි මේ තරගාවලිය පවත්වන්නේ. එම තරගාවලියට ජාතික කණ්ඩායම නියෝජනය කරන සියලුම දෙනා සහභාගි වීම අනිවාර්යයි” යැයි ශම්මි සිල්වා මහතා වැඩි දුරටත් පැවසීය.

දකුණු අප්‍රිකාවට එරෙහිව බදාදා පැවැත්වෙන සිවුවැනි එක්දින තරගයේදී ශ්‍රී ලංකා පිලේ උප නායක නිරෝෂන් දික්වැල්ලට ස්ථානය අහිමිවීමට බොහෝ දුරට ඉඩ තිබේ. එම තරගයට ප්‍රියමාල් පෙරේරා සහ ඇන්ජලෝ පෙරේරා ක්‍රීඩා කිරීමට නියමිතය.

දකුණු අප්‍රිකාවට එරෙහිව විස්සයි20 තරගාවලියට සුරංග ලක්මාල්, සදීර සමරවික්‍රම සහ අසිත ප්‍රනාන්දු යන ක්‍රීඩකයන් සහභාගි කරවීමට ද මේ වන විට තේරීම් කමිටුවේ අවධානය යොමුවී තිබේ.

 

ඔබේ ප්‍රතිචාර

නම :
විද්‍යුත් තැපැල් ලිපිනය :
ඔබේ ප‍්‍රතිචාර :
දකුණු අප්‍රිකාව සුපිරි ඕවරය ජයගනී...
2019-03-19 21:28:52
තරග තුනකින් සමන්විත විස්සයි20 ක්‍රිකට් තරගාවලිය ආරම්භ කරමින් කේප් ටවුන්හි නිව්ලන්ඞ්ස් ක්‍රීඩාංගණයේදී අද (19) පැවැති පළමු විස්සයි-2...
උදානගේ ප්‍රවේගකාරී පිතිහරඹය අපතේ යයි...
2019-03-22 21:34:17
ප්‍රවේගකාරී පිතිහරඹයක නිරත වෙමින් පන්දු 48 කදී නොදැවී ලකුණු 84 ක් රැස්කිරීමට ඉසුරු උදාන සමත් වුවද, මුල් පෙළ පිතිකරුවන්ගේ අසාර්ථකත්වය හ...
දකුණු අප්‍රිකානු ජ්‍යෙෂ්ඨයෝ විවේක ගනිති...
2019-03-18 18:13:33
ශ්‍රී ලංකාවට එරෙහිව පැවැත්වෙන තරග 3 කින් සමන්විත විස්සයි20 ජාත්‍යන්තර ක්‍රිකට් තරගාවලිය සඳහා නම් කරන ලද දකුණු අප්‍රිකානු ස...
හතුරුසිංහ පුහුණුකරු තනතුරේ දිගටම...
2019-03-22 18:48:34
ලෝක කුසලාන තරගාවලියේදී ශ්‍රී ලංකා පිලේ ප්‍රධාන පුහුණුකරු ලෙස වර්තමාන පුහුණුකරු චන්දික හතුරුසිංහ මහතා ම කටයුතු කරන බව ශ්‍රී ලංක...