. කල්ලිවාදයේ ගොදුරක් වූ ශ්‍රී ලංකා කණ්ඩායම | කෙළිමඬල
2019 අපේ‍්‍රල් මස 20 වැනි සෙනසුරාදා
කල්ලිවාදයේ ගොදුරක් වූ ශ්‍රී ලංකා කණ්ඩායම
2019-04-06 15:56:58 | බන්ධුල සුබසිංහ

කණ කැස්බෑවා විය සිදුරෙන්  අහස දකින කතාව සිහියට නැගෙන්නේ   අප්‍රිකාවේදී ලද ටෙස්ට් ජයග්‍රහණයෙන් අනතුරුව ශ්‍රී ලංකා පිල නැවතත් සුපුරුදු පරාජයේ මාවතට අවතීර්ණ වීමෙන් පසුවය.

ලෝක කුසලාන තරගාවලියට පෙර තවත් එක්දින තරග දෙකක් පමණක් ඉතිරිව තිබියදී දකුණු අප්‍රිකාව හමුවේ පිට පිටම පස්වන එක්දින තරගයත් පරාජයෙන්ම අවසන් වූයේය. එය  සුවහසක් ශ්‍රී ලාංකික ක්‍රිකට් ප්‍රේක්ෂක ජනතාවගේ බලාපොරොත්තු නැවත නැවතත් මහ පොළවට සමතලා කර දැමීමකි.

ශ්‍රී ලංකා ජාතික ක්‍රිකට් කණ්ඩායම සහභාගීවූ අවසන් එක්දින තරගාවලි හතෙන් ජයග්‍රහණය කර ඇත්තේ එක තරගාවලියක් පමණි. මෙම දත්ත අනුව ශ්‍රී ලංකා කණ්ඩායමේ වත්මන් තරග ජයග්‍රහණ අනුපාතය 7 ට 1 කි. එහි ජයග්‍රහණ ප්‍රතිශතය 14% වැනි ඉතාමත්ම දුර්වල අගයකි.

ඉහත කී තරගාවලි හත තුලදී ශ්‍රී ලංකා ජාතික කණ්ඩායම ඉන්දියාව, පාකිස්තානය,  සිම්බාවේ, බංග්ලාදේශය, ඇෆ්ගනිස්තානය, නවසීලන්තය සහ දකුණු අප්‍රිකාව  යන රටවල් වලට එරෙහිව තරග 28කට ක්‍රීඩා කළේය. ඒවායින් ජයලබා ඇත්තේ තරග හතක් පමණි. අවසන් තරග 28 තුළ තරග ජයග්‍රහණය කිරීමේ ප්‍රතිශතය 25% කි. මෙම තරග 28 ඇතුළත ශ්‍රී ලංකා කණ්ඩායම බංග්ලාදේශයට සහ සිම්බාවේට පමණක් නොව ආධුනික ඇෆ්ගනිස්තානයට පවා පරාජයට පත්වී තිබීම ශ්‍රී ලාංකිකයන්ගේ මහතා කණගාටුවට කරුණක් විය‍.

ශ්‍රී ලංකා කණ්ඩායම සහභාගීවූ අවසන් එක්දින තරග  13 න් ජයග්‍රහණය කර ඇත්තේ එක තරගයත් පමණක් වීම තුලින් ශ්‍රී ලංකා එක්දින ජාත්‍යන්තර ක්‍රිකට් කණ්ඩායමේ කඩාවැටීම දිගින් දිගටම සිදු වෙමින් පවතින බව නම් සක් සුදක් සේ පෙන්නුම් කරයි.

ඉහතකී තරගාවලි  හත තුල නායකයන් හතරදෙනකු පමණ කණ්ඩායමට නායකත්වය ලබාදී තිබේ. එහෙත් පුහුණුකරුවා ලෙස කටයුතු කරනු ලැබ ඇත්තේ චන්දික හතුරුසිංහ මහතා පමණි.

වත්මන් දකුණු අප්‍රිකානු සංචාරය හැරුනුකොට, කණ්ඩායමට ක්‍රීඩා කරන ලද්දේද බොහෝවිට එකම ක්‍රීඩකයන් ගොන්නකගෙන් සැදුම්ලත් කණ්ඩායමකි. දිගින් දිගටම ලද පරාජයන් හමුවේ සහය පුහුණුකරුවන් කළමණාකරුවන් ආදීන් වෙනස් වුවත් පුහුණුකරුවා වෙනස් නොවන සාධකය බවට පත්වී තිබේ.

පුහුණුකරුවා වශයෙන් චන්දික හතුරුසිංහ  මහතා මසකට රුපියල් ලක්ෂ 50 ඉක්මවන,  විශ්මය දනවන  වේතනයක් ශ්‍රී ලංකා ක්‍රිකට් ආයතනයෙන් ලබාගන්නා බව වාර්තා වේ. එහෙත් ඔහු විසින් මේ දක්වා ශ්‍රී ලංකා ක්‍රිකට් ක්‍රීඩාවේ හෝ ජාතික ක්‍රිකට් කණ්ඩායමේ සාර්ථකත්වය උදෙසා සිදුකර ඇති කාර්‍යභාරය ඔහු ගේ මාසික වැටුපට අලගු තැබීමටවත් තරම් නොවන බව ක්‍රිකට් සහෘදයන් ගේ මතයයි. මේ දක්වා ඔහු විසින් සකස් කරන ලද සියලුම සැලසුම් අසාර්ථකත්වයට පත්ව ඇති අතර ඔහු පුහුණුකරුවාගේ කාර්‍යභාරය ඉටුකරනවාටත් වඩා උනන්දුවක් දක්වනු ලබන්නේ තේරීම් කමිටුවේ කාර්‍යභාරය සියතට ගෙන කටයුතු කිරීමට බව තතු දන්නෝ පවසති.

අන් අයට පැවරී ඇති  වගකීම්, ඔවුන්ගේ කලමණාකරණ සීමවට පැන සියතට ගෙන කටයුතු කිරීමට යාමෙන් සියල්ල අවුල් වන බව කළමණාකරනයේ මූලධර්ම පිළිඹඳ නිසි අවබෝධයක් නොමැති හතුරුසිංහ මහතා නොදැන සිටීම ඉතා අවාසනාවන්ත තත්ත්වයකි. චන්දික හතුරුසිංහ මහතා යටතේ රට වෙනුවෙන් ක්‍රීඩා කලයුතු ක්‍රීඩකයන් වෙනුවට පුහුණුකරු වෙනුවෙන් ක්‍රීඩාකරන ක්‍රීඩකයන් බිහිවී තිබීම ඉතාම ගැඹුරෙන් සිතා බැලිය යුතු කණගාටු දායක තත්ත්වයක් වේ

කිසියම් ජත්‍යන්තර  ක්‍රීඩා කණ්ඩායමක පුහුණුකරුවා යනු එම ක්‍රීඩාවට අදාල තාක්ෂණික ඥාණය සහ උපක්‍රම කණ්ඩායමට ලබාදී කණ්ඩායම පුහුණුවෙන් සන්නද්ධ කරන පුද්ගලයාවේ. කණ්ඩායම් නායකයා සමඟ එකමුතුව ක්‍රීඩා කළයුතු වන්නේ තම රට වෙනු වෙනි. සිය ජයග්‍රහණය හමුවේ තම රටේ  ජාතික ධජය හෝ ලාංඡනය ඔසවමින් සතුට සහ අභිමානය අත්විඳින ජත්‍යන්තර  ක්‍රීඩකයන් අප හට නිරන්තරයෙන් දක්නට ලැබෙනුයේ එ බැවිනි.

අනෙක් අතට රට පෙරට ගෙන කිසියම් කණ්ඩායමක් එක අරමුණකට යොමුකිරීම සාපේක්ෂව පහසු කටයුත්තකි. එය එසේ වන්නේ සාමාන්‍යයෙන් ඕනෑම රටක මිනිසුන් තමන් රට වෙනුවෙන් ක්‍රියාකරන අයෙකු ලෙස හඳුන්වනු ලැබීම ඔවුන් හට අභිමානයක් ඇතිකරවන්නක් බැවිනි.

තත්ත්වය එසේ වුවත් මෙම පහසු ඉලක්කය පසෙක ලා ජාතික ක්‍රිකට් කණ්ඩායමේ ක්‍රීඩකයන් එක් එක් පෞද්ගලික කල්ලි තුලට ගාල්කර තිබීම ඛේදවාචකයකි. එය කණ්ඩායම තුල කල්ලි වාදය නිර්මාණය වීමේ ආරම්භයයි. කණ්ඩායම තුළ කණ්ඩායම් හැඟීම විනාශ වී යාමට හේතුවයි. කණ්ඩායමේ අසාර්ථකත්වයේත් පරාජයේත් අඩිතාලමයි.

වර්තමානයේ ජාතික ක්‍රිකට් කණ්ඩායමේ කල්ලිවාදය ක්‍රීඩකයන් ගේ බිරින්දෑවරුන් අතරටද ගමන්කර තිබීම ඛේදවාචකයකි. එමෙන් ම වත්මන් ජාතික කණ්ඩායමේ ඇතැම් ක්‍රීඩකයින් තමන්ගේ පෞද්ගලික ධනය වැයකර සමාජ ජාල ගිනුම් නඩත්තු කරමින් තම ප්‍රතිරූපය ඔසවා තැබීමටත්, කණ්ඩායම තුළ තමන්ට හෝ තම නායකත්වයට හෝ නායකත්ව සිහිනයට අභියෝගයක් විය හැකි ක්‍රීඩකයන්ට නිර්දය ලෙස පහර ගැසීමටත් එම ගිණුම් උපයෝගී කරගනිමින් සිටියි.

සමාජ ජාලාතුළ මෙම සටන ඉතාමත් ගුජුප්සාජනක ලෙස සිදුවෙමින් පවතී. මෙවැනි කණ්ඩායමක් රට වෙනුවෙන් අවි දරා සටනකට ගියහොත් ප්‍රතිවාදීන් මර්දනය කිරීම පසෙකලා එකිනෙකා මරාගන්නා තත්ත්වයක් ඇතිවේවි යැයි සිතෙන තරමට මෙම සමාජ ජාලා සටන සහාසිකය.

හිටපු ක්‍රිකට් සභාපති තිලංග සුමතිපාල මහතා පවා මෙම සමාජ ජාලා සටන සම්බන්ධයෙන් සිය අප්‍රසාදය ප්‍රකාශ කර තිබුණද ඔහුගේ කාලයේදී හෝ ඒ වෙනුවෙන් ගත් ක්‍රියාමාර්ගයක් නැත. ඒ අතරවාරයේදී පුහුණුකරු ලෙස චන්දික හතුරුසිංහ මහතා විසින් කරනු ලැබ ඇත්තේ ඉහත කල්ලි වලට එරෙහිව, කණ්ඩායම තුළ තම කල්ලිය නිර්මාණය කර තිබීම පමණක් බව පෙනීයයි.

කෙසේවෙතත් කණ්ඩායම තුළ සිය ස්ථානය තහවුරු කරගැනීම සඳහා මෙම කල්ලිවාදී ක්‍රීඩකයන් නොකරන්නේ දක්ෂතා දැක්වීම පමණි.

පුහුණුකරු ගේ මුග්ධ ක්‍රියාකලාපය නිසා පමණක් නොව, නායකත්වයට නුසුදුසු ක්‍රීඩකයන් නායකත්වයට පත්වීමද වත්මන් ශ්‍රී ලංකා කණ්ඩායමේ කඩා වැටීමට තවත් එක් ප්‍රබල හේතුවකි. ජතික කණ්ඩායම මෙහෙයවන නායකයා දක්ෂ කලමනාකරුවෙකු විය යුතුමය. අර්ජුන රණතුංග, සනත්ජයසූරිය, මාවන් අතපත්තු, මහේල ජයවර්ධන මෙන්ම කුමාර් සංගක්කාර ආදී සියලුම නායකයෝ අතිදක්ෂ කළමනාකරුවෝ වූහ.

සංගක්කාර සහ මහේල ජයවර්ධනගෙන් පසු ජ්‍යෙෂ්ඨ ක්‍රීඩකයන්ට ඇති හිතවත්කම, ඉහල පරිපාලනයට කේලාම් කීමඅ, පුහුණුකරුගේ හිතවතෙකු වීම ආදිය නායකත්වයට පත්වීමට සුදුසුකම් ලෙස සලකනු ලැබූ බව නොරහසකි. මෙවැනි අය, නායකයින් වශයෙන් පිටිය මැදදී අසරණ වන විට ඔවුන් පරිපාලනය ඉදිරියේ සහෝදර ක්‍රීඩකයන් විවේචනය කරමින් තමන්ගේ තැන රැකගැනීමට කටයුතු කරමින්, කණ්ඩායම් හැඟීම විනාශකර  දමා ඇත.

ඇන්ජලෝ මැතිව්ස්, දිනේෂ් චන්දිමාල්, උපුල් තරංග, සුරංග ලක්මාල්,  තිසර පෙරේරා  මෙන්ම ලසිත් මාලිංග යන සියලුම නායකයන් තමන් නායකත්වයට නුසුදුසු බව යලි යලිත් ඔප්පු කරමින් සිටිති.

රට වෙනුවෙන් නොව, තමන් වෙනුවෙන් ක්‍රීඩා කරන එවැන්නන් කිසියම් විශේෂ දක්ෂතාවයක් දක්වනු ලැබූ කල රටේ ලාංඡනය වෙනුවට තම ජර්සි අංකය හෝ නම හුවාදක්වනු ලැබූ අවස්ථා ප්‍රේක්ෂකයන් හටද මතක ඇතැයි සිතමි. එහෙත් තිලකරත්න ඩිල්ශාන්, මුත්තයියා මුරලිදරන් වැනි ක්‍රීඩකයින් එවැනි අවස්ථාවලදී රටේ ලාංඡනය ගෙනහැර පෑවේ ඔවුන් එකල රට වෙනුවෙන් ක්‍රීඩා කළ බැවිනි.

කෙසේ⁣ වෙතත් ඉහතින් සඳහන් කළ වර්ගයේ නයකයන් කාලාන්තරයක් තිස්සේ තම හිතවතුන් කණ්ඩායමට ඇතුළත් කරන ලද නිසාද ශ්‍රී ලංකා ජාතික ක්‍රිකට් කණ්ඩායමට අහිමිවී ගිය සහ අහිමි වෙමින් පවතින දක්ෂ ක්‍රීඩකයන් බොහොමයකි. මෙවැනි නායකයන් මෙන්ම පුහුණුකරුවාද තම තමන්ගේ අරමුණු ඉටුකරගැනීම සඳහා වාසි ලබාගත හැකි බාහිර පුද්ගලයන් විවිධ උපක්‍රම මගින් සිය ග්‍රහණයට නතුකරගෙන තිබීමත් ඛේදවාචකයකි.

 

ඔබේ ප්‍රතිචාර

නම :
විද්‍යුත් තැපැල් ලිපිනය :
ඔබේ ප‍්‍රතිචාර :
මාලිංග ක්‍රිකට් පිටියෙන් සමුගනී ...
2019-04-17 20:23:33
ශ්‍රී ලංකා එක්දින පිලේ හිටපු නායක සුපිරි වේග පන්දු යවන ක්‍රීඩක ලසිත් මාලිංග අන්තර්ජාතික ක්‍රිකට් පිටියෙන් සමුගැනීමට තීරණය කර ඇ...
ලෝක කුසලාන පිලේ නායකත්වය දිමුත්ට...
2019-04-16 12:50:36
ලබන මාසයේදී ආරම්භ වන ලෝක කුසලාන තරගාවලියේදී ශ්‍රී ලංකා කණ්ඩායම මෙහෙයවීමේ වගකීම ටෙස්ට් නායක දිමුත් කරුණාරත්නට පැවරෙනු ඇතැයි වාර්තා වේ. ලෝක කු...
ආරම්භක පිතිකරුවන් තෝරාගැනීමේ හිසරදය...
2019-04-17 13:35:49
ශ්‍රී ලංකාව ක්‍රිකට් ලෝක ශූරයන් බවට පත්වූ 1996 වසරේදී මෙන්ම අනු ශූරයන් බවට පත්වූ 2007 සහ 2011 වසරවලදීත් ශ්‍රී ලංකා කණ්ඩායමට ආර...
ලෝක කුසලාන තරගාවලියෙන් ප්‍රබලයෝ විසිවෙති...
2019-04-18 13:53:06
එංගලන්තයේදී ලබන මැයි මස 30 වැනිදා ආරම්භ වන ලෝක කුසලාන ක්‍රිකට් තරගාවලියට සහභාගි වන ශ්‍රී ලංකා සංචිතයෙන් ශ්‍රී ලංකා පිලේ හිටපු ...
ලෝක කුසලාන තරගාවලියෙන් ප්‍රබලයෝ විසිවෙති...
ශ්‍රී ලංකා කන්ඩායමට සුබපතන්නද... පෘතුගීසි කන්ඩායමට සුබපතන්නද කියලා හිතාගන්න බෑ ...
මාලිංග ක්‍රිකට් පිටියෙන් සමුගනී ...
තේරීම් කමිටු සභාපති පවසන ආකයට මාලිංගගේ නායකත්වය කිසිම ගැටළුවක් නැතත් අනෙත් ක්‍රීඩකයන් සහයෝගය නොදෙක්වීමයි. රටක් නියෝජනය කරන අනෙත් ක්‍රීඩකයන් නායකයට සහය...
මාලිංග ක්‍රිකට් පිටියෙන් සමුගනී ...
රටට සෙල්ලම් කරන්න බැරි අය වැඩක් නෑ.....තමන්ගේ පෞද්ගලික හිතු මතේට මෙහෙම රටක්....  සෙල්ලම් කරන්න තරගෙකට බැහැ කියන එක මහ අමන වැඩක්..... රටේ සල්ලි...
මාලිංග ක්‍රිකට් පිටියෙන් සමුගනී ...
මාලිංග කරුණාකර මහජනතාවට පෙන්නන්න ඔබ තනතුරු සඳහා ගිජු පුද්ගලයෙක් නොවන බව....ලෝක කුසලාන තරගාවලිය සඳහා ඉදිරිපත් වී දක්ෂතා පෙන්වන්න. මහජනතාව ...
ආරම්භක පිතිකරුවන් තෝරාගැනීමේ හිසරදය...
මේ පාර ලෝක කුසලානය දිනන්න ඕනි නෑ. 2023 ලෝක කුසාලනය ඉලක්ක කරගෙනවත් ටීම් එක තේරුවනම් හොදයි. ක්‍රිකට් දන්න අය ගහපු හැටි අපි දැක්කා හොදටම. අලුත් ක...