. සෙරීනා නැති විම්බල්ඩන් පිටියේ වීනස් පෙරට පනී | කෙළිමඬල
2018 මැයි මස 24 වැනි බ‍්‍රහස්පතින්දා
සෙරීනා නැති විම්බල්ඩන් පිටියේ වීනස් පෙරට පනී
2017-07-15 12:22:28 | සැකසුම - මොහාන් ප්‍රනාන්දු

ග්‍රෑන්ඞ් ස්ලෑම් ටෙනිස් ශූරතාවක් දිනූ වයස්ගතම ක්‍රීඩිකාව බවට පත්වීමේ සිහිනය දකිමින් සිටින අමෙරිකාවේ වීනස් විලියම්ස් අද ශ්‍රී ලංකා වේලාවෙන් පස්වරු 6.30ට විම්බල්ඩන් ටෙනිස් ශූරතාවලියේ කාන්තා කේවල අවසන් මහා තරගයට එක්වන්නීය.

දැනට 37 හැවිරිදි වියෙහි පසුවන වීනස් අද හවස බිඳ දැමීමට බලාපොරොත්තු වන්නේ ඇගේම බාල නැගණිය සෙරීනා විලියම්ස් පසුගිය ජනවාරියේ ඕස්ටේ්‍රලියානු විවෘත ටෙනිස් කිරුළ දිනා එවැනි හපන්කමක් කළ ලොව වයස්ගතම ක්‍රීඩිකාව ලෙස තැබූ වාර්තාවයි. ඕස්ටේ්‍රලියානු විවෘත ටෙනිස් කිරුළ දිනද්දී සෙරීනාගේ වයස අවුරුදු 35 යි දින 125 කි. වීනස්ගේ වයස අදට අවුරුදු 37 කුත්, දින 28 කි.

සෙරීනා තරම් හැඩිදැඩි ක්‍රීඩිකාවක් නොවන වීනස්ට ඇත්තේ තරමක් කෙසඟ සිරුරකි. ඇයගේ ප්‍රතිවාදිනිය වන්නේද වසර දෙකකට ඉහතදී සෙරීනාට පරාජය වූ ගාබීන් මුගුරූසාය.

මීට දින අටකට කළින් ලන්ඩන් නුවර ඕල්ඞ් ඉන්ග්ලන්ඞ් ක්ලබ් හී දී ආරම්භ වූ මෙවර විම්බල්ඩන් ටෙනිස් ශූරතාවලියේ අවසන් මහා තරගය දක්වා පැමිණි ගමන් මග අතරතුර මේ වයස්ගත ක්‍රීඩිකාව 1997 වසරේ උපන් නාඹර ක්‍රීඩිකාවන් තිදෙනෙකුම පරාජයට පත් කළාය. 1997 වසර යනු වීනස් පළමු වරට විම්බල්ඩන් ටෙනිස් ශූරතාවලියට ක්‍රීඩා කළ වසර වීම කැපී පෙනෙන කාරණාවකි.

‘මම වයස ගැන හිතන්නේ නෑ‘ සිරුරින් මෙන්ම මනසින් ද ශක්තිමත් බව උපරිමයෙන් පෙන්වමින් සිටින මේ ක්‍රීඩිකාව ඊයේ එසේ කීවාය.

ඇය 1994 දී මාටිනා නව්රතිලෝවාගෙන් පසුව විම්බල්ඩන් අවසන් මහා තරගයට එක්වූ වයස්ගතම ක්‍රීඩිකාව ලෙස දැනටමත් වාර්තපොතට එක්වී සිටින්නීය.

වසර 2000 සිට 2009 දක්වා කාලය අතරතුර විම්බල්ඩන් ටෙනිස් පිටිය සසළ කළ වීනස් විලියම්ස් ඒ කාලය තුල ශූරතා 5ක්ම දිනාගත් අතර අනුශූරතා 3 කුත් ගෙදර ගෙන ගියාය. එතෙක් මෙතෙක් ග්‍රෑන්ඞ් ස්ලැම් ටෙනිස් ශූරතා 7කට හිමිකම් කියන වීනස් 2008 වසරින් පසුව තවම එවැනි හපන්කමක් පෙන්වා නැතිවීමත් විශේෂත්වයකි.

වත්මන් කාන්තා ටෙනිස් ශ්‍රේණිගත කිරීම් අතරේ 10 වැනි තැන සිටින වීනස් සමග අද තරගයට ක්‍රීඩා කරන්නේ පසුගිය වසරේදී ප්‍රංශ විවෘත ටෙනිස් කිරුළ දිනූ වත්මන් ශ්‍රේණිගත කිරීම්වල 14 වැනි තැන සිටින ගාබීන් මුගුරූසාය. ඇය මේ තරගාවලියේදී පෙරළිකාර ක්‍රීඩා විලාශයක නිරතවූ අතර සිවුවැනි වටයේදී වත්මන් ශ්‍රේණිගත කිරීම්වල පෙරමුණේ පසුවන ඇන්ජලික් කේබර් පරාජය කිරීමට සමත්වූවාය. ඇය අවසන් තරගයට පිවිසියේ අර්ධ අවසන් පූර්ව වටයේදී 7 වැනි තැන පසුවන ස්වෙට්ලානා කුසනොට්සෝවා පරාජයට පත් කරමිනි.

ඇය වසර 2015 දීත් විම්බල්ඩන් අවසන් මහා තරගයට සුදුසුකම් ලැබූ අතර එහිදී සෙරීනා විලියම්ස් හමුවේ පරාජයට පත්ව අනුශුරතාවයෙන් පමණක් සෑහීමකට පත්වීමට සිදුවිය. අද ඇගේ අරමුණ වී ඇත්තේ මංගල විම්බල්ඩන් කිරුළ දිනා සෙරීනාගේ වැඩිමල් සොයුරිය පරදවා නංගිගෙන් ලැබූ පරාජයේ වාඩුව අක්කාගෙන් ගැනීමටය. එසේ වුවත් වීනස්ගේ හැකියාව ගැන මුගුරූසාට ඇත්තේ පුදුමයකි.

“මේ ක්‍රීඩාව ගැන වීනස්ට ඇති උනන්දුවත්, හැකියාවත් පුදුම දෙයක්. ඇය තවමත් කෙල්ලෙක් වගේ වැඩ දානවා. කොච්චර තරග දින්නත් එයාගේ තරග දිනීමේ පිපාසය තවමත් එහෙමමයි. අපෝ මම නම් හිතන්නෙ නෑ අවුරුදු 37 වෙද්දී මම නම් මේ විදිහට සෙල්ලම් කරාවි කියලා.” මුගුරූසා එසේ කීවාය.

 

සැකසුම - මොහාන් ප්‍රනාන්දු

 

ඔබේ ප්‍රතිචාර

නම :
විද්‍යුත් තැපැල් ලිපිනය :
ඔබේ ප‍්‍රතිචාර :
බැංගලෝර් - මුම්බායි තරගාවලියෙන් ඉවතට...
2018-05-20 22:14:42
අයි.පී.එල්. තරගාවලියේ ප්‍රබල කණ්ඩායම් දෙකක් ලෙස සැලකෙන මුම්බායි ඉන්දියන්ස් සහ රෝයල් චැලේන්ජර්ස් බැංගලෝර් කණ්ඩායම් වලට මේ වසරේදී (2018)...
දෙවරක් දිනුවොත් රජකම වසර 8 කට...
2018-05-18 21:36:01
ශ්‍රී ලංකාවේ බලවත්ම ජාතික ක්‍රීඩා සංගමය ලෙසින් සැලකෙන ශ්‍රී ලංකා ක්‍රිකට් ආයතනයේ ව්‍යවස්ථාව සංශෝධනය කිරීමට ශ්‍රී ල...
පන්දු නොයැවීමට මැතිව්ස්ගෙන් තීරණයක්...
2018-05-20 20:41:12
දීර්ඝ කාලීන අබාධිත තත්ත්වයට තිත තබමින් නැවතත් ඉක්මනින් ක්‍රීඩාකරන්න ලැබීම ගැන තමන් ඉතාමත් සතුටට පත්වූ බව ශ්‍රී ලංකා කණ්ඩායමේ හිටපු...
චෙන්නායි පිල අවසන් තරගයට...
2018-05-22 18:53:38
හුදකලා සටනක නිරතවූ ෆැෆ් ඩු ප්ලේසීස්ගේ විශිෂ්ට පිතිහරඹය හමුවේ අයි.පී.එල් ක්‍රිකට් තරගාවලියේ අවසන් මහ තරගය සඳහා සුදුසුකම් ලබාගැනීමට චෙන්...