. බැඩ්මින්ටන් සංගමයට අනතුරු ඇඟවීමක් | කෙළිමඬල
2018 පෙබරවාරි මස 19 වැනි සඳුදා
බැඩ්මින්ටන් සංගමයට අනතුරු ඇඟවීමක්
2017-11-24 13:50:03 | නාමල් පතිරගේ

ජාත්‍යන්තර තහනමකට ලක්ව තිබෙන ශ්‍රී ලංකාවේ බැඞ්මින්ටන් ක්‍රීඩා පරිපාලනයේ ගැටලු ලබන දෙසැම්බර් 31 වැනිදාට පෙර නිරාකරණය කර නොගන්නේ නම් ඕස්ට්‍රේලියාවේ ගෝල්ඞ්කෝස්ට් නුවර දී පැවැත්වෙන පොදුරාජ්‍ය මණ්ඩලීය ක්‍රීඩා උළෙලේ බැඞ්මින්ටන් තරගාවලියෙන් ශ්‍රී ලංකාව ඉවත් කරන බවට පොදුරාජ්‍ය මණ්ඩලීය ක්‍රීඩා සම්මේලනය ජාතික ඔලිම්පික් කමිටුවට ඊයේ (23) නිල වශයෙන් දැනුම් දී තිබේ.

ඕස්ට්‍රේලියාවේ ගෝල්ඞ්කෝස්ට් නුවර දී 21 වැනි පොදුරාජ්‍ය මණ්ඩලීය ක්‍රීඩා උළෙල පැවැත්වෙන්නේ ලබන අප්‍රේල් 4 වැනිදා සිට 15 වැනිදා දක්වාය. බැඞ්මින්ටන් ඇතුළු ක්‍රීඩා ඉසව් 17ක් එම ක්‍රීඩා උළෙලට ඇතුළත් වේ. ශ්‍රී ලංකාවට එහිදී බැඞ්මින්ටන් ක්‍රීඩාවෙන් කණ්ඩායම් ඉසව් සඳහා ක්‍රීඩකයන් හා ක්‍රීඩිකාවන් තිදෙනකු බැගින් සහභාගි කිරීමේ අවස්ථාව හිමිවනු ඇතැයි ඔලිම්පික් කමිටු ආරංචි මාර්ග සඳහන් කරයි.

ශ්‍රී ලංකාවේ බැඞ්මින්ටන් ක්‍රීඩා පරිපාලනයේ පවතින ආරවුල් සැලකිල්ලට ගනිමින් ශ්‍රී ලංකාවට අන්තර්ජාතික බැඞ්මින්ටන් තහනමක් පැනවීමට ලෝක බැඞ්මින්ටන් සම්මේලනය පසුගිය 23 වැනිදා පියවර ගත්තේය. එහිදී ලෝක සම්මේලනය දැනුම් දී තිබුණේ ශ්‍රී ලංකාවේ බැඞ්මින්ටන් පරිපාලනයට එල්ලවී ඇතැයි කියන රජයේ (දේශපාලන) බලපෑම් ඉවත්කර නැවත ශ්‍රී ලංකා බැඞ්මින්ටන් සම්මේලනය ස්ථාපිත කිරීමට කටයුතු කර දැනුම් දෙන තුරු ශ්‍රී ලංකාව ලෝක බැඞ්මින්ටන් සම්මේලනයේ සාමාජිකත්වයෙන් තාවකාලිකව ඉවත් කිරීමට කටයුතු කළ බවයි.

කෙසේ වුවත් බැඞ්මින්ටන් පරිපාලනයේ පවතින අර්බුද හේතුවෙන් ක්‍රීඩා අමාත්‍යාංශය එහි නිලවරණය අත්හිටුවා තාවකාලික අතුරු කමිටුවක් පත් කළේ එහි නිසි බළධාරියා ලෙස ක්‍රීඩා අධ්‍යක්ෂ ජනරාල් සමන් බණ්ඩාර මහතා පත්කරමිනි.

එවකට බැඞ්මින්ටන් සම්මේලනයේ සභාපති ධුරය දැරූ නිෂාන්ත ජයසිංහ මහතා කමිටුවේ සභාපතිවරයා ලෙසත් කටයුතු කරයි. මෙම සිදුවීමෙන් පසුව ක්‍රීඩා ඇමැති දයාසිරි ජයසේකර මහතා ඉකුත් ඔක්තෝබර් 31 වැනිදාට බැඞ්මින්ටන් සම්මේලනයේ සියලු පාර්ශ්ව කැඳවා පොදු එකඟතාවයක් මත එහි නිලවරණය පැවැත්වීම සඳහා විශේෂ කමිටුවක් පත් කර ගැනුණි. කෙසේ වුවත් මෙතෙක් නිලවරණය පැවැත්වෙන දින වකවානු ප්‍රකාශයට පත්ව නොමැති අතර, මේ වන විට බැඞ්මින්ටන් පරිපාලනයේ අර්බුදය සම්බන්ධයෙන් අධිකරණයේ නඩුවක් ද විභාග වෙමින් පවතී.

නිලවරණය කැඳවීමේ මූලික සාකච්ඡාව සඳහා එම නඩුවේ පාර්ශ්ව වෙනුවෙන් පෙනී සිටින නීතිඥවරුන් කැඳවනු ලැබිණ. ජාතික ඔලිම්පික් කමිටුවට පොදුරාජ්‍ය මණ්ඩලීය ක්‍රීඩා සම්මේලනය කළ දැනුම් දීම නිල වශයෙන් ශ්‍රී ලංකා බැඞ්මින්ටන් සම්මේලනයට (මූලස්ථාන කාර්යාලයට) යොමු කිරීමට ජාතික ඔලිම්පික් කමිටුව ඊයේ පියවර ගත් බව ද වාර්තා වේ.

ලෝක සම්මේලනයේ තහනම හමුවේ ශ්‍රී ලංකාවට ජාත්‍යන්තර තරගාවලි හා ජාත්‍යන්තර බැඞ්මින්ටන් සමුළුව හා වැඩමුළු සඳහා සහභාගිවීම ද දැනටමත් තහනම් කර තිබේ.

 


නම :
විද්‍යුත් තැපැල් ලිපිනය :
ඔබේ ප‍්‍රතිචාර :
අවදානමෙන් ගැලවෙන්න ශ්‍රී ලංකාව ජය සොයයි ...
2018-02-14 18:39:38
බංග්ලාදේශය, පාකිස්තානය සහ ඉන්දියාව හමුවේ පිට පිටම ලද විස්සයි20 තරග 8 ක පරාජයන් පසෙකලා, මාසයකට ආසන්න කාලයක් තුළ බංග්ලදේශයේදී ලැබූ සාර්ථකත්ව...
පිතිකරුවෝ ශ්‍රී ලංකාව දිනවති...
2018-02-15 16:44:38
ශ්‍රී ලංකාව සහ බංග්ලාදේශය අතර ඩකාහි ශ්‍රේ බංග්ලා ක්‍රීඩාංගණයේදී අද (15 වැනිදා) පැවැති පළමු විස්සයි20 ක්‍රිකට් තරගයෙන් කඩුල...
ශ්‍රී ලංකාවට සටනකින් තොර ජයක්...
2018-02-18 16:52:41
බංග්ලාදේශ ක්‍රීඩකයින්ගෙන් සටන්කාමී ක්‍රීඩා විලාශයක් දක්නට නොලැබීම හේතුවෙන් ශිලාත්හිදි අද (18 වැනිදා) පැවැති දෙවැනි සහ අවසන් විස්සය...
චනිඳුගෙන් නව ශ්‍රී ලංකා වාර්තාවක්...
2018-02-12 14:44:31
වැලිසර නාවික හමුදා වෙඩි පිටියේ පැවති ජාතික වෙඩිතැබීමේ ශූරතාවලියේ වායු රයිෆල් ඉසව්වේ යොවුන්, කනිෂ්ඨ සහ විවෘත කාණ්ඩවල රන් පදක්කම් දිනාගැනීමට...