. බෝයගොඩ ලෝක වාර්තාගත පිතිහරඹයක | කෙළිමඬල
2018 පෙබරවාරි මස 19 වැනි සඳුදා
බෝයගොඩ ලෝක වාර්තාගත පිතිහරඹයක
2018-01-23 14:08:08 | .

වයස 19 න් පහළ අන්තර්ජාතික තරගයකදී පිතිකරුවකු ලබාගත් වැඩිම ලකුණු සංඛ්‍යාව රැස්කරමින් ලෝක වාර්තාවක් පිහිටුවීමට හසිත බෝයගොඩ සමත් විය. නවසීලන්තයේදී පැවැත්වෙන වයස 19 න් පහළ ලෝක කුසලාන තරගාවලියේ අද (23 වැනිදා) පැවැති පළඟ අර්ධ අවසන් පූරව තරගයකදී කෙන්යාවට එරෙහිව ලකුණු 191 ක් රැස්කරමින් ඔහු මේ හපන්කම කළේය. 

හසිතයේ දැවැන්ත ඉනිම නිසා මෙම තරගයේදී කෙන්යාව පරදවා ලකුණු 311 ක වාර්තාගත ජයක් අත්කර ගැනීමටද ශ්‍රී ලංකා කණ්ඩායමට හැකි විය. 

දකුණතින් පිත්ත හසුරුවන ආරම්භක පිතිකරුවා පන්දු 151 කින් ලකුණු 191 ක් ලබාගත් හෙයින් ඕවර 50 ක් ඇතුළත කඩුලු 4 කට ලකුණු 419 ක් ලබාගැනීමට ශ්‍රී ලංකා යොවුන් පිල සමත් විය. පන්දු 39 කදී අර්ධ ශතකය සම්පූර්ණ කළ මෙම දකුණත් පිතිකරුවා, පන්දු 88 කදී ශතකය සම්පූර්ණ කළ අතර පන්දු 126 කදී ලකුණු 150 සීමාවද පසුකර ගියේය. 

කාසියේ වාසිය දිනා පළමුවෙන් පන්දුවට පහරදුන් ශ්‍රී ලංකා කණ්ඩායම වෙනුවෙන් ධනංජය ලක්ෂාන් (29) සමග එක්ව පන්දු 68 කදී ලකුණු 87 ක සම්බන්ධතාවක් ගොඩනැගීමට බෝයගොඩ සමත් විය. ඉන් නොනැවණ ඔහු නිෂාන් මධුසංක (60) සමග එක්ව දෙවැනි කඩුල්ල වෙනුවෙන් පන්දු 133 කදී ලකුණු 147 ක සම්බන්ධතාවක්ද, ජෙහාන් ඩැනියෙල් (37) සමග එක්ව තෙවැනි කඩුල්ල වෙනුවෙන් පන්දු 56 කදී ලකුණු 89 ක සම්බන්ධතාවක්ද ගොඩනැගුවේය. 

ද්විත්ව ශතකයට ලකුණු 9 ක් මෙපිටින් සිටියදී රෙනී වෙයාගේ පන්දුවක් හමුවේ අන්කිත් හිරානි අතට උඩ පන්දුවක් දෙමින් ශ්‍රී ලංකා ඉනිමේ සිවුවැනි කඩුල්ල ලෙස බෝයගොඩ පිටියෙන් ඉවත්ව ගියේය. ඒ වන විට ශ්‍රී ලංකා කණ්ඩායමේ මුලු ලකුණු සංඛ්‍යාව 339 ක් ලෙස සටහන් විය. 

බෝයගොඩගේ දැවී යෑමෙන් අනතුරුව කමිඳු මෙන්ඩිස් (නොදැවී 53) සහ නිවනිඳු ප්‍රනාන්දු (නොදැවී 35) එක්ව 5 වැනි කඩුල්ල වෙනුවෙන් පන්දු 35 කදී ලකුණු 80 ක නොබිඳුණ සම්බන්ධතාවක් ගොඩනගමින් ශ්‍රී ලංකා ඉනිමේ ලකුණු සංඛ්‍යාව 400 සීමාවෙන් ඔබ්බට රැගෙන ගියහ.

පන්දු 21 කදී වාර්තා වූ කමිඳුගේ අර්ධ ශතකයට හයේ පහර 4 ක් සහ හතරේ පහර 3 ක් ඇතුළත් වූ අතර නිවනිඳුගේ ඉනිම හයේ පහරකින් සහ හතරේ පහර 5 කින් සමන්විත විය. 

ජයග්‍රහණය සඳහා ලකුණු 420 ක ඉලක්කයක් හඹාගිය කෙන්යා කණ්ඩායම ඕවර 35.5 ක් අවසානයේ ලකුණු 108 කට සීමා කිරීමට හරීන් බුද්ධිල ප්‍රමුඛ ශ්‍රී ලංකා පන්දු යවන්නෝ සමත් වූහ. එහිදී දක්ෂ පන්දු යැවීමක නිතර වූ බුද්ධිල, නිලකුණු ඕවරයක්ද සමගින් සිය ඕවර 10 ලකුණු 27 කට සීමාකරගත් අතර කඩුලු 4 ක් දවාගත්තේය. 

 

 

 

 


-036 

 


නම :
විද්‍යුත් තැපැල් ලිපිනය :
ඔබේ ප‍්‍රතිචාර :
අවදානමෙන් ගැලවෙන්න ශ්‍රී ලංකාව ජය සොයයි ...
2018-02-14 18:39:38
බංග්ලාදේශය, පාකිස්තානය සහ ඉන්දියාව හමුවේ පිට පිටම ලද විස්සයි20 තරග 8 ක පරාජයන් පසෙකලා, මාසයකට ආසන්න කාලයක් තුළ බංග්ලදේශයේදී ලැබූ සාර්ථකත්ව...
පිතිකරුවෝ ශ්‍රී ලංකාව දිනවති...
2018-02-15 16:44:38
ශ්‍රී ලංකාව සහ බංග්ලාදේශය අතර ඩකාහි ශ්‍රේ බංග්ලා ක්‍රීඩාංගණයේදී අද (15 වැනිදා) පැවැති පළමු විස්සයි20 ක්‍රිකට් තරගයෙන් කඩුල...
ශ්‍රී ලංකාවට සටනකින් තොර ජයක්...
2018-02-18 16:52:41
බංග්ලාදේශ ක්‍රීඩකයින්ගෙන් සටන්කාමී ක්‍රීඩා විලාශයක් දක්නට නොලැබීම හේතුවෙන් ශිලාත්හිදි අද (18 වැනිදා) පැවැති දෙවැනි සහ අවසන් විස්සය...
චනිඳුගෙන් නව ශ්‍රී ලංකා වාර්තාවක්...
2018-02-12 14:44:31
වැලිසර නාවික හමුදා වෙඩි පිටියේ පැවති ජාතික වෙඩිතැබීමේ ශූරතාවලියේ වායු රයිෆල් ඉසව්වේ යොවුන්, කනිෂ්ඨ සහ විවෘත කාණ්ඩවල රන් පදක්කම් දිනාගැනීමට...